पुण्याई

चंद्र राहिला नाही भाबड्या चकोरांचा
चांदण्यावरी ताबा आजकाल चोरांचा

लागले न झाडांना दोनचार शिंतोडे
नाचही सुरू झाला जंगलात मोरांचा

मी अजूनही येथे श्वास घेतला नाही
दे सुगंध थोडासा कालच्या फुलोरांचा !

मांडले कुणी येथे आज ताट सोन्याचे ?
आठवे न रामाला द्रोण रानबोरांचा!

मी तुझा क्षणासाठी हात घेतला हाती...
कायदा कसा पाळू मी तुझ्या बिलोरांचा ?

राहिली जगी माझी एवढीच पुण्याई
मी  न सोयरा झालो त्या हरामखोरांचा !

- सुरेश भट